《客家消息》

 | | | 轉寄

轉載:「2018客家青年國際事務訪問團」客家青年 傳愛歐洲

作者 2018.08.19

「2018客家青年國際事務訪問團」ti西班牙客家年會上廣受鄉親好評，下後to法國進行文化交流，8月14號to德國奧格斯堡ke安養中心進行志工服務lâu表演，同現場長者互動表達關懷，讓老人家試著當貼心。這間由明愛基金會設立ke St. Anna安養中心，熱情迎接客家青年，特別ti大門口、電梯lâu走道明顯處tu張貼了歡迎臺灣客家青年ke海報，長者打早就在會場聚總起來，期待青年演出。學員以英、客語雙聲帶演出，老人家雖然聽m̀識，共樣跈等打節拍，認真聽，熱情拍手。學員除忒客家才藝表演，ya設計簡單客語教學lâu健身操，老人家當大方ke上台以德國腔講客，十分生趣，ya帶來當多笑聲，表演後學員下場lâu老人家親切問候，一一致贈小等路，當多老人家tu感動to跌目汁。

安養中心經理Franz Eduard Schmidt表示，這群年輕人vi長者帶來活力，他們跳舞、唱歌、演奏樂器lâu表演武術，為中心平凡ke生活帶來變化，團員們除忒用簡單ke英文lâu老人家互動，ya透過扼手、相揇，甚至he唚面，表達關懷之意，pûn這兜老人家十分感動。恁好ke事情，希望做得輒常發生在小鎮。他同時表示，看到當多老人家緊喀等學員ke手久久m̀放，甚至當像想流目汁，做麼个老人家會恁呢，是因爭ti德國安養院大體he老人家ke盡尾一站，當中ya-yû當多老人家當久mò屋家人來探望，liá-ha看著這兜後生人，十分歡喜。歸屋tu-he青春ke笑聲lâu歡樂，pûn老人家試著心肝當燒暖。這兜客家後生仔ya因為這場志願服務，yû mò共樣ke人生體驗，為臺灣做了一擺成功ke國民外交。