《李喬小說─寒夜》

| | | 轉寄

兒女情(15)

  阿桂伯婆算he第一號貴賓,坐ti阿強伯左片。阿漢公婆應命共下食飯,就坐ti阿強伯對面。

  今晡日食ke he加一息仔蕃薯ke白米飯。Liá-he難得ke享受,逐儕人都猛扒強吞,yi像m̀記得桌項相當豐富ke菜肴。

  燈妹ke飯碗肚,堆淰了好菜。她單淨兜等,輕輕仔沾一下嘴唇就mò動過。

  她低頭挺腰,規規矩矩坐等。M̀敢動筷仔,m̀敢看麼人,心頭亂鬨鬨ke;當想噭,目汁yi像ti目眶底下流動。她愁慮會一下mò注意pùn目汁pûn湧出來。Liá m̀-he難過ya-he哀傷,單淨he m̀知樣仔,目汁硬擠ti目眶唇m̀肯轉去。

  故所她mò閒去聽麼人講mak-ke,並且完全放棄進食ke念頭。

  阿漢顛倒頗為坦然。有一度食物ke魅力竟完全控制住厥注意力,án-ngiòng揮灑自如ke狼吞虎嚥起來。

  M̀過,好在,他yi遽就發覺有兜投向他ke烱烱目光。他霍然一驚。隨即冷靜下來。

  Án-ngiòng他也只擎擎筷子,挪一挪飯碗,做兜仔進食ke樣仔,再也m̀敢放肆。

  「Oi liá個樣仔mò?」心肝肚有一股疑惑,也對自家ke怯儒不滿。

  心肝肚,還有其他東西ti浮沉不已。該差m̀多安到悲哀吧。他想。悲哀,八腳蜘蛛樣仔,飃浮跳躍ke鬼火樣仔,緊緊絆他。

  燈妹就坐ti身邊。Liá時節oi看清楚她ke面貌卻當困難,因為頸根長時間m̀轉動,既經僵直。

  「燈妹定著也受夠了。」他想。

  「宴席」結束,阿桂伯婆就oi轉去。今晡日he轉m̀去銅鑼ke,老人家講她oi ti大湖街看看親戚。結果護送ke任務,由阿陵承擔過去。

  「恁仔細阿桂伯婆。」他用最大ke力氣講:「拜託妳轉告她……ngài該阿媽……」

  「樣?」

  「講,講恁仔細她……oi她自家保重……」講完,他流目汁了。

  下晝,大嫂來傳達「大人」ke意旨:下晝做得ti新房休息,mò-oi做mak-ke工了。

  阿漢m̀好意思留ti間房,還he到彭家廳下聽大家閒聊。

  彭家ke人,折騰老半天,食忒飯,實際上既經申時將過。Liá時節阿強伯告訴阿漢:oi他公婆也ko食兜仔,馬馬虎虎,算he暗餐。

  「Ngài……食m̀落。」

  「該就喊燈妹來食。」

  燈妹卻也講食m̀落。他知燈妹定著當飢。想裝兜仔飯菜到間房pûn燈妹食,m̀過他m̀敢。後來他央請阿陵嫂幐手。

  阿陵嫂m̀吭氣,帶等孩子們食飽後,順便盛一大碗飯菜轉去pûn燈妹。

  燈妹煞煞兜等飯碗行出間房,像往常án-ngiòng,到灶下lâu飯食忒。

  He餵豬時節了。Liá-he燈妹份內ke頭路;他想lâu新衫服換下來,然後去餵豬。阿漢表示他去餵豬。燈妹緊張ke搖頭。

  結果還he阿陵嫂幐手。日頭滑落西山以後,下了一場驟烈ke風時雨;雨停mò幾久,卻又拍噠拍噠下起「日頭雨」來了;四圍yi遽就暗下來。

  阿漢拿出水油燈盞點著。Ti購買ke時節,阿陵告訴他,liá會pûn認為浪費ke,他還he買下它。

  外背風勢加強,木條編成ke前後門,縫隙很大;強風鑽入來,燈盞火大幅度ke搖晃,隨時可能烏忒。

  該時,總算做得當近ke,不慌不忙ke看著燈妹啦。M̀過燈火晃擺,pûn他mò辦法真切完整ke看出燈妹ke歸ke形貌lâu神情。

  「燈妹。」他小心,細聲喊她。

  「……」燈妹mò應,圓身也mò動一下。

  Liá個細妹人,就he ngài ke餔娘了。Ngài ke,ngài自家ke細妹人。他想。他深入去體會liá ke關係ke各種意義。

  Ngài oi好好保護她一生。好好oi她。嗯。Oi,liá-ha心肝肚ke liá種味道就he愛吧?

  她,燈妹m̀知有像ngài心肝肚liá種味道ke東西?她會愛ngài mò?

  她會。他肯定ke認為。

  因為,她也he一ke孤單ke人,可憐ke人。Ên都he。Ên共樣;ên m̀相愛,還有麼人會相愛喏?

  「燈妹……」總oi講兜仔mak-ke呀。他決定。