《李喬小說─寒夜》

 | | | 轉寄

變(13)

作者 李喬 漢羅翻寫：Suingi 2011.08.07

　　有一日，日頭就oi 落入盲仔潭後ke雜樹林時分，該出走超過半年ke人華，旋旋風出現ti伯公廟面前；人華後背還跈等一ke細倈細人；ti拉開兩丈距離ke後背，還有一ke婦人家企ti該片呆呆m̀停動。
　　人華朝婦人家儘擛手；搖手又招呼，然後拱手又作揖。婦人家雙腳一跺，yi像下了最大ke決心，快步衝前十幾步，總算lâu細倈細人揇起來。她，就he後來出走ke人華嫂芹妹。

　　人華公婆帶等德生，轉到彭屋時，彭屋ke人ti食今晡日ke「第二餐」。彭屋m̀使靠山紅菜、馬齒莧過餐了；老少都he一人一碗蕃薯乾。

　　「……大叔，遽，遽來食！」大嫂良妹打頭陣開口。

　　「阿爸。阿媽。」人華企ti門檻項，單淨喊了爺ôi就停頓下來。

　　阿爸、阿媽坐等mò停動。老阿母懷中正揇等瘦小烏糊糊ke靜妹。靜妹m̀知仰仔哇一聲噭起來，噭聲he án細弱乏力……

　　「阿媽！」芹妹放下小德生，衝到阿媽面前。

　　「哇！哇！」小靜妹噭到當激烈，噭聲卻還he十分低弱。

　　芹妹猛地伸出雙手，想lâu靜妹揇過來。阿媽卻一側身，lâu靜妹帶向左片方位，芹妹抱m̀著了。

　　「阿媽。」芹妹「篤」一聲，雙膝落地，跪了下來。

　　「阿公，阿公！」小德生yi像liá正認出阿公，sak-sak向阿公走過去。

　　「唔……」阿公只好十分心m̀甘情m̀願ke伸手揇起小德生。

　　「阿爸……」人華也跪ti地泥項。

　　小靜妹噭聲沙瘂又短促。芹妹跪等挪前幾步，伸手oi揇小靜妹。

　　「Pûn……」阿爸向阿媽呶呶嘴，mò lâu話聲講出來。

　　芹妹總算揇著妹仔。芹妹lâu妹仔揇入懷中。又親又唚；自家卻吞聲幽泣，面項目汁鼻水闌干。奇怪ke he小靜妹馬上恬靜下來，m̀識ko噭鬧了。

　　「阿爸。」人傑提醒阿爸。

　　「唔，起來。」老爸嗓門澀澀ke，liá句話顯然麼人都聽m̀到，只好用力咳兩下，清清喉嚨：「起來！食，遽食兜仔……」

　　人華公婆轉來了。公婆倆ke態度變了當多；m̀識ko án-ngiòng怨天尤人，不滿而尚勝；倆人早起晚睡，默默做事，完全he「蕃仔林人」ke作風。

　　人華絕口不提離開蕃仔林ke日仔，做了兜mak-ke？抑he識發生mak-ke？mak-ke時節lâu芹妹會合ke？芹妹方面又樣般喏？公婆倆m̀露一點口風，別人也m̀敢打聽。Liá he一ke謎，m̀過liá m̀重要，公婆倆改頭換面，肯認命ke做一ke食山飯ke人，án-nè就做得了。

　　阿強伯公婆心肝肚頗感安慰，對於人華ke轉變，阿強伯十分滿意。彭屋ke勞動力增強了，既有ke園圃既經恢復舊觀，幾塊預定開拓ke荒地也次第完成。M̀過相對ke，阿漢liá儕人，還啊看來無麼用處啦。