《李喬小說─荒村》

 | | | 轉寄

五、多少人間不平事(5)

作者 李喬 漢羅翻寫：劉敏貞 2011.08.07

係ke, lâu liá-teû統治者ke鷹犬看m̀到面係做m̀得ke.

三月初，郡役所派人到古阿龍ke屋家，軟硬兼施，oi他teû收回請願書。他teû無má人答應。

第二日早晨，李勝丁等三個巡查將劉阿漢帶到郡役所，用「調查案件」ke籠統名目，將他留置下來。

「你係膿頭，膿頭剔掉，事情就好辦lè.」李某講。

他莫名其妙pûn人拘留十四日。他釋放後chang知，在liá期間，州方面會同郡役所，又再尋請願人兩pái.好加在，liá-teû細農都緊堅持立場，m̀肯放棄原則。

「到底，會樣仔？」古阿龍liá位老人家ke恐懼逐漸加深。

「M̀知，總m̀會殺頭就係。」後生ke彭金城，從細聰明伶俐，係見識較多ke山村青年。

「不論有結果無結果，ên不能軟弱下來。」阿漢苦心解說：「Liá係為天理正義來戰，全台灣都共樣；此地失敗，無定著其他農民獲得成功。」

「別人，還管？我自家就管m̀了啦！」山鄉老農總係比較難以通達事理ke.

「Liá係互相響應嘛。共樣ke,別地方ke努力失敗，也可能ên liá片ke成功喏。」

「Ke就看上蒼吧。」古阿龍講。

「不能單淨看上天，oi看自家正可靠。」阿漢糾正他。

「哼！我看都做m̀得靠！」

「無m̀著，台灣人，還有mak-ke可靠ke ?」

無言。阿漢無言。Liá-teû人ke話顯然十分正確。但係，就án-ngiòng認lè嗎？話講轉來，m̀認又有mak-ke辦法？阿漢不覺伸手撫摸身上ke-teû瘢痕……

但係，新ke風暴又已來襲：

今年夏日來得chhin慢，m̀-ku五月下旬一下「風時雨」過後，氣溫忽然間拔高，以後就無再ko下降。

訂立新佃耕契ke期限會到lè, 也就係二三十家ke土地正式oi成為別人產業ke日期臨近lè.向各級ke請願，相同無消息。文協本部方面，也無任何交代；郡役所、庄役場方面也按兵不動，m̀識ko催告。

Liá下，ke受害者當中，有teû人沉m̀住氣，主張放棄。他teû ke講辭係：

「反正抗m̀過，除了皮肉之痛，牢獄之災外，又有mak-ke用？土地係丟thet定定。生前奈何m̀了liá-teû豬狗惡霸，待在閻王面前chang算帳吧。」

係ke. Liá就係中國人ke性格，更係台灣人ke特性；liá係受盡劫難，屈辱ke種族自然衍生出來ke人生態度吧。

「反正，本島人，生成係做牛做馬ke.」Liá又係另一種想法。

Liá係 m̀好ke情勢。彭金城等後一輩緊張lè,走來蕃仔林尋阿漢叔設法。阿漢瞭解情況後，決定到南湖庄彭家看看。另外命金城請大細南勢方面也派幾個代表過去參詳。

「阿漢叔，昨晡日我弄到一隻羌仔，又肥又大；蕃仔酒也堵好起甕，你來住一宿，好好醉一下。好嗎？」

金城係彭人華ke第二個賴仔，照排行，該喊阿漢一聲姑丈正係，m̀-ku燈妹係彭家「花囤女」；就係彭家m̀承認燈妹做妹仔，阿漢係「續」人秀身份ke,故所後來就稱他一聲「阿漢叔」啦。

「好，ke好。」阿漢答應。

Liá幾年他ke酒量kín大，有sit-pá上癮ke痕迹。飲「蕃仔酒」，係在三十零年前馬拉邦之役，受傷流落「他貝來社」ke時節開始ke. 先住民用糯米釀酒，酒麴泡在糯米缸底背，單淨等糯米「轉酒」滲出乳白色濁酒，就án-ngiòng飲將起來。他teû sa m̀敢；他teû得在乳白色濁酒封裝酒甕三隻月，等渣滓沈澱，酒液澄清後正啟甕飲用。Liá就係阿漢最愛飲ke酒。

Liá日係六月一號。臨走時，大賴仔受阿姆之命陪他同行。理由係：阻止他飲過量ke酒。近來他輒常「轉酒」，抓了chhin多隻兔(吐)仔，故所在pû娘ke安排，單淨好俯首接受。

「阿青他，他也chhin好飲哩！」冬妹憂形在色。

「聽到你pû娘ke話無？」阿姆拉下ke面色中，好像還有sit-bá揶揄ke意思。

阿漢忽然間精神抖擻，心情舒朗十分愉悅。內心好像有mak-ke在燒。

他想，暗晡頭做得來開懷飲暢飲正係。至於明青，嘿嘿，先lâu liá老實賴仔灌醉再講。

「哈哈！」想到liá位不覺笑起來。

Liá一夜，他teû兩子爺lâu金城lâu古阿龍、劉俊梅等，果然都飲得十分盡興。因為經他動以利害，曉以大義後，ke-teû動搖份子都安定下來。

「Ên不能半途撤退；liá一撤，以後就pûn人食定lè.」他肅然講。

「M̀-ku，m̀-ku有效嗎？」

「無效，也不能後退！怕mak-ke，敢講狗仔真oi綁三十來家ke人去殺頭？M̀會，絕對m̀會。理由chhin簡單：他teû內心有鬼，因為他teû一手遮天，他teû明白自家chang係強盜。」

接tén,趁著最昂揚ke情緒，他又作一場即席演講。Án-ngiòng liá-teû人ke勇氣鬪志，又鼓舞起來。

Liá一頓羌仔肉配蕃仔酒，係在逐家交換意見，取得保證立場一致後chang開始。故所無人m̀盡興，時間也拖得chhin長。好笑ke係明青果然chhin遽就醉lè;醉後嚷tén oi轉去，拔腿就往外走。最尾還係老阿爸lâu他拖轉來，並照顧睡妥。

「我還màng醉，可見我 m̀算老哩！」

Án-ngiòng想係chhin歡喜。故所他勤動筷仔，頻頻乾杯。最尾，差m̀多係午夜過後吧，他眠下來。感覺底背圓身往上浮起來一駁仔，然後安頓下來。差m̀多係自家醉倒在眠床吧。他朦朧ke意識底背，還能感覺liá-teû.他笑起來。

他試tén自家緊在笑。M̀過笑聲好像怪怪，好像鼻腔塞滿mak-ke, 呼吸chhin m̀順暢，眼眶也脹脹澀澀。

難道係哭嗎？聽講近來醉了，自家往往會哭。嗯，m̀係聽講，係事實。再醉，總係還維持一絲清醒，故所知自家確實常在酒後莫名其妙哭一場。

Ke, liá下自家係在邊笑邊哭囉？嘻嘻！Liá算mak-ke嘛！睡吧！好好睡，天一光就轉去，轉去，嗯自家還màng全老哩！對！近來逐日都會想起自家還màng老；還màng老chang能做chhin多事情。知無？燈妹啊！阿漢還能做chhin多事情，燈妹妳當然也還màng老囉。故所嘻嘻……

他無聲無息地笑lè,然後拉起鼾聲睡thet.M̀-ku好像chang完全睡thet,一長串哀淒ke「噩狗喊」－狗見到妖魔鬼怪時發出ke悽厲懼怖喊聲－忽然間傳過來。

嗯，m̀只係「噩狗喊」，大細狗羣發譴又驚慌ke吠喊哩！他醒lè,一絲異樣ke感覺浮上心頭，他爬起來，tui竹窗往外瞧去。

「啊！」