《江嵐客家文學專欄》

| | | 轉寄

阿細妹ke故事(4)

阿細妹ke「卡桑」月妹,因為白內障ke關係,目珠早就看m̀到矣。有一擺,月妹尋m̀到東西,好嘴問阿碌伯姆,阿碌伯姆對嘴就應佢講:「看m̀到,m̀會用摸嘿!」。月妹實在mò簡單,在mò水mò電ke庄下搬來都市,都市項項就oi用到電,佢想oi同阿細妹幐手,臨暗仔就會使用電鍋仔煮飯,內鍋、外鍋都oi放水,月妹就用手測水,再用左手摸插頭孔,右手拿插頭插電鍋煮飯,輒輒pûn電電到。佢乜m̀識怨嘆一句,顛倒he阿碌伯姆麼該事情就m̀會幐手,一日到暗噥噥噥噥唸m̀停,出嘴mò一句好話。

月妹當惜阿細妹ke細人仔,故所逐ke細人仔就同這隻姐婆較好。月妹he有麼該好食ke東西,都會pûn細人仔食香,這兜細人仔出去做事,乜會偷偷捏捏,捏兜仔錢pûn姐婆做所費,大家同姐婆ke感情都盡好。

M̀過講乜奇怪,自從阿碌伯姆邸ti阿細妹屋家起勢,目珠就定定仔濛濛,阿細妹當緊張,煞煞帶去pûn先生看,大大細細ke醫生館看透透,就mò麼該見效,過四、五年仔後,阿碌伯姆ke目珠就全看m̀著矣。

  阿細妹異會教細人仔,逐隻細人仔就當有教料,會讀書又有禮貌,總he阿碌伯姆來過後,就輒輒聽到阿細妹打細人仔,阿碌伯姆m̀-he講錢m̀見忒,就he講細人仔mò教料。家娘投,又做m̀得m̀處理,阿細妹就只好打細人仔pûn家娘消氣。為著家娘ke事情,兩公婆乜輒輒冤家,自從阿碌伯姆來到阿細妹屋家,這家人就m̀識過過一日太平ke日仔。

阿細妹日時頭oi上班做事,差m̀多日日就加班加到三更mò半夜,暗晡頭轉來又歸屋間仔鬧叉叉仔,兩公婆舞到oi離緣,連細人仔就mò想邸屋家,一隻一隻尋工廠邸宿舍,書乜mò-oi讀,日仔就恁仰吵吵鬧鬧過哩十過年。阿碌伯姆算來盡好命,食到七十零歲正過身。厥賴仔心舅、妹仔婿郎對庄下來到都市,大家就怕mò先去同阿碌伯姆上香,就啾等阿細妹講愛去奈嫽又去奈嫽,摝到阿細妹mò葛mò煞。辦喪事期間,阿細妹ke屋家就像旅舍樣仔,逐朝晨帶一大陣小郎叔、小娘姑出去遶山看風景,暗晡頭轉來屋家歇,tap-tap摝到阿碌伯姆還山,佢兜正轉去。

  厥老公阿雲mò法度接受阿姆過身ke事實,食矣兩罐太白酒,目視視仔視等厥丈人哀講:「天mò目珠,天mò目珠,死m̀著人矣!」意思he講,該死ke he阿細妹ke「卡桑」月妹,死m̀著人死到厥姆。為著阿雲這句話忒過傷人,阿細妹同月妹,心肝盡艱苦,兩子哀目汁含等就出去稅一間屋仔來邸。阿碌伯姆歇ti阿細妹屋家這十過年,歸間屋仔舞到強強就會散忒,這下阿雲又講出恁仰ke話,阿細妹真經堵m̀著矣,tap-tap在外背服侍其「卡桑」服侍到過身。月妹過身ke時節,阿細妹ke細人仔逐隻就有轉來送,顛倒做來比佢兜ke親阿婆還較像樣,這點pûn阿細妹當安慰:「好得你這兜恁有心,同若姐婆ke後事辦來恁圓滿,若姐婆平時惜你兜又有用喔!」

  Ên台灣人ke教條總he勸和m̀勸離,在子女ke鼓勵之下,阿雲乜好嘴來拜託阿細妹搬轉去屋家,一家人又和和樂樂過日仔。

  社會和平,經濟穩定,阿細妹ke子女逐隻就有正常ke頭路,今年過年食團圓飯,oi辦三張桌正坐得落,外孫、內孫圍等阿公阿婆捩捩轉,阿婆前阿婆後,喊到阿細妹笑洋洋,紅包收到衫袋仔淰淰,歡歡喜喜食到百二歲。

  菜籽命ke阿細妹,總算春光矣。

2008/7/10