《江嵐客家文學專欄》

| | | 轉寄

山肚來ke細阿哥è 第四集

阿成行到茶店,想愛坐下來食一杯茶探一下路,mò想到連空位è就mò,阿成影a 過去,看到有一張桌mò坐nâm,就行過去問kì-teû-sà,做得坐共下食茶mò?該張桌ke人客統體就yi後生,看阿成老實老實就答應kì共下坐,lià teû人在該講賣鹽ke頭路,kì-teû帶來ke錢還增差幾下擔鹽ke本錢,因爭kì-teû在海唇khâi魚è來lià賣,堵到熱天日頭又大,有teû魚è mò萋,價數mò好續蝕到本,臨時赴及又mò奈好調,阿成問清楚頭尾,就講想愛加入then出這幾擔鹽ke本錢,大家聽到有teû è懷疑,看阿成mò幾多歲又án嫩子,敢有án多錢?mau頭ke he黃炎虎,大家喊kì老虎哥,就同阿成講lià下就愛請工人,還愛拿鹽錢分店頭家,he講正經ke話,大家lià下就愛lâu錢收揪來,工人請好粘時就愛起工li,m̀知阿成有麼該意見mò?阿成算算è,自家khâi一擔,扣忒工錢,割價lâu賣出ke價數,還有一息利頭,試到算得和,就lâu所有ke錢拿出來買鹽。

朝晨正對山頂行下來,lià下又愛khâi鹽上山,阿成雖然還yi嫩子,m̀過,總he想到愛分阿姆過好日è,就做來盡煞猛,山頂ke細人è,nai隻m̀ he做到像牛牯樣è烏刻刻è,流汗晒日頭he平常事;khâi鹽比khâi茶米較重,又還愛khâi上山,對阿成來講實在有較食力,阿成m̀敢推懶,總he煞煞thèn等頭前人ke腳步sái,一直到日頭落山,m̀知行過幾多粒山頭,會斷烏lè,頭前he幾下百坎ke石段è,阿成實在khâi m̀贏lè又m̀敢講,等到刻耐è跋到盡尾一段,阿成lâu擔頭khâi到路唇piong下來,一陣黃膽對心頭湧起,phôn到歸草坪,大家頓恬下來liau一下,老虎哥拿茶水行過來分阿成,一隻手搭kiâ肩頭笑笑è講:「細阿哥è,ngì怕自從m̀識做過án重ke事hó?」阿成分kì問到當phài-se,mò應kì,笑笑è接過老虎哥ke水講一句:「án 仔細。」就lâu釅茶lâu膽汁共下吞落tú-sṳ́去,老虎哥指等頭前花花ke光線講:「會到lê,頭前該間he ngâ屋家,在該hiet一暗晡,天光日再khâi入山肚項。ngì還khâi è贏mò?」阿成有teû è苦笑講:「做得。」khâi起擔頭就同大家共下來到老虎哥屋家ke禾埕。