《江嵐客家文學專欄》

| | | 轉寄

山肚來ke細阿哥è 第三集

阿成順續問lià地方ke老人家,北片sak該條大路透到奈位去,請問lià位ke名產he麼該?大家就當熱心同kì紹介:「lià條大路透到都市去,該位盡鬧熱,屋è chat-chat,有西洋樓è屋me有大夥房,街肚項人chiâm人,紅男綠女一千擔,愛麼該就有麼該,ngì想è出來ke東西kì就有,ngì想m̀到ke東西kì me有,該he一ke盡繁華ke所在。」村長像做官人樣è,講到口潾波白,金光罩頂。村長轉一下話頭就問:「細阿哥è,ngì he m̀驚食苦ke話啊,天光日ngài-teû堵堵愛出茶米,需要人工then手khâi茶米去賣,ngì he肯去,就算ngì一擔額,ngì看ngióng般?」

mò想到阿成還較靈通,人講ke:「打蛇打七寸」。一下就問村長敢做得賣一擔茶米分kì,kì thèn大家共下去街項賣好mò?村長一下續應m̀出話,問大家ke意見,大家參詳一下,試到me做得,平平he khâi到街項賣,lià下就lâu茶米錢收到li,還省一擔工人錢,算算è算得和,故所就留阿成在lià食夜,暗晡夜tai村長屋家,天光日同大家共下khâi茶米去街項賣,阿成he:「行船走馬三分命」。

阿成生來瘦瘦,mò幾高è,m̀過力頭當飽,七早八早就同大家共下khâi茶米出庄,經過一大片青油油ke茶園,一行一行筆直ke茶樹,mò輸he麼儕拿等尺來量過樣è,實在還靚哪!打早,日頭màng出來,山頂濛沙煙màng退,茶園項一陣khâi擔ke人行過去,就像he一條龍在濛煙肚項sò a過,形成一幅靚ne ne ke圖畫。

khâi擔人mò簡單,khâi等歸百斤ke茶米,行過一山又一山,過溝過圳,行到過晝pat lat正到街項,阿成對山頂項看哪下,看到歸坪è屋,大大細細、高高矮矮,紅色、青色、烏色ke屋頂都有,試到當歡喜,行入街項歸排è楠楠吊吊ke看板,寫等各式各樣ke店號,閒閒ke人打扮到靚靚,在街項行來行去,yi像mò事做樣è,好命祿祿è。

阿成thèn等khâi茶米ke人來到集貨市場,將茶米交分中盤商,大家撿到錢先去食飯食酒,食飽飯還yi早,大家講還愛去lâu-lâu-è買teû東西帶轉去,阿成想愛在街項行行è,mò想愛同kì-teû共下去買東西,就同大家告別,承蒙大家ke相惜lâu照顧。