《江嵐客家文學專欄》

 | | | 轉寄

山肚來ke細阿哥è 第一集

作者 Kông-làm...江嵐 2008.11.23

在深山肚項，有一間爛屋è，屋肚項het兩子ôi，阿姆安到阿梅，lai-è he阿成，kì-teû mò土地me mò圃園，故所阿梅就滿奈去ngiâm柴摘野菜轉來畜lai-è，下把è就捉teû山兔同山雞，二子ôi mò親mò戚，mò鄰舍朋友，m̀過kì-teû有當大ke花園，山連山峎連峎，白雲青天花開四季，lià兩子ôi試到yi滿足lià種平凡ke生活。

「等水難滾，等子難大」。

有一日，阿姆對阿成講：「ên tai ti山頂高mò前途，阿姆希望ngì做得出去lâu lâu看看lé，學teû手藝ya-he尋頭路做，將來討夫娘傳後，有一個圓滿ke家竇，án-ngiòng阿姆畜ngì正有採工。」阿梅又講，老古人有講：「敢去就一擔樵，m̀敢去就屋家愁！」

阿成從細就m̀識行出lià片山林，kì me m̀知外背ke世界生來麼該款，雖然講本旦就當想愛出去見一下世面，總he試到piong阿姆一sà人在山肚項，萬一出麼該事情，喊天天m̀應喊地地m̀靈，愛ngiong結煞，阿成gû下來同阿姆講：「媽，ên兩sà共下去好mò，一來做得做伴，二來做得互相照顧，he mò，piong阿姆一sà人在深山肚項，ngài me m̀ fong心。」阿姆聽到lai-è án賢孝，心肝肚盡安慰，試到畜kì án大就有價值li，阿姆當m̀盼得摸等阿成ke頭那，忍等目汁講：「阿成，ngì he細lai人，愛一sà人出去打拚，阿姆身體還健健，ngì做ngì fong心去出外，ngài會好好照顧ngài自家，阿姆me mò麼該好分ngì做所費，ngì就lâu今晡日捉到ke山羊同阿姆滷ke山豬肉拿去賣，賣到ke錢就拿來做所費，將來he討有夫娘正帶轉來分阿姆看，án ngiòng，ngài將來過身正有面目對得起祖公li！」

阿成講m̀贏阿姆，單淨頭犁犁è準備包袱è，阿姆在櫃è肚項拿出一身衫褲分阿成：「阿成，lià he若爸頭擺著ke衫，lià身還yi新，ngì lià下堵堵著得，lià兩隻禁指he 若爸同ngài訂親時ke信物。」阿梅ke喉嗹頭yi像哽等麼該東西，ki-ki-gu-gu 講mò麼該出聲，thèn等又講：「lià隻手ak he若婆留下來ke，ngì做盡帶等，出門在外，總會有用到ke時節。」

阿成接到lià-teû東西，心肝肚hién hién風像有一粒大石牯chak下來，就像he阿姆lâu歸間屋場交到kiâ手頭共樣án重，阿成看等阿姆瘦夾夾ke手骨，心肝一陣軟痛，為著自家ke前途lâu阿姆ke希望，忍等湧出來ke目汁，強強吞倒轉去，m̀敢在阿姆面前跌下來。

出門該日，阿梅打早hong起來sap昭和菜、phoi樹薯，包teû è phoi熟ke山豬肉，分阿成帶去路項食。阿成照常打早就去屋側角yiet樹薯，順續去後山khuan昨暗晡夾到ke一隻山兔è，先去河灞項lâu山兔è cii3好正入來灶下食朝，食飽朝煞煞揹等滷肉同包袱è，牽等昨晡日捉到ke山羊，行出kì自從m̀識離開過ke家園。阿姆一路送kì送到對門山ke山峎頂高，阿成喊阿姆m̀好再過送lè。lià央時ke日頭堵堵跋上山，千條萬線ke金光chàng到兩子ôi ke目珠pak m̀開，阿成趕lià-ke機會煞煞下山，一路喊阿姆愛保重，一定愛等阿成轉來，阿成ke目汁跌到歸路è，心肝肚緊想阿姆ke容顏，想到chhòi過ke阿姆tai ti山崗壁角，生活án困苦，自家lià擺下山，一定愛煞猛打拚，賺teû錢轉來有孝阿姆。