《客語白話字聖經試讀版》

| | | 轉寄

Mâ-thai Fuk-yîm, Thi-3-chông_1, Sṳ̂-sé Yok-hon ke Chhòn-tho

3:1 Ke-sṳ̀, hàng sé-lî ke Yok-hon chhiu lòi-to Yù-thai ke khóng-yâ chhòn-tho, kóng :
3:2 “Ngì-teû yin-tông oi hi-chhie̍t chhui-ok, yîn-vi thiên-koet voi sṳ̍t-hien lè.”
3:3 Yok-hon chit he siên-tî Yî-soi-â só kóng ke ngìn; Kì-kóng: Chhai khóng-yâ yû ngìn hêm kóng : “Oi chún-phi Chú ke lu,siû-chhi̍t Kì só oi hàng ke se-lu.”
3:4 Yok-hon chok-tén lo̍k-thò-mô cho ke sâm-fu, yeû-khiên thak-tén phì-tai; sṳ̍t chhó-máng lâu yâ-me̍t ko ngit-è.
3:5 Ke-sṳ̀ Yâ-lu-sat-lâng , Yù-thai chhiòn-thi, lâu Yok-tán-hò yit-tai thi-fông ke ngìn, tu chhut-lòi chhiu-khiun Yok-hon;
3:6 Kì-teû sṳ̀n-ngìn chhṳ-kâ ke chhui, Yok-hon chhai Yok-tan-hò vi kì-teû sé-lî.
3:7 Yok-hon khon-tó Fap-li-soi-ngìn lâu Sat-tû-kâi-ngìn ya lòi chhîn-chhiu kì hàng sé-lî, chhiu tui kì-teû kóng : “Ngì liá-teû thu̍k-sà â ! Song-ti ke sṳ́m-phan voi to lé, ngì-teû láu-tó sám-tet-khôi mâ?
3:8 Chúng-he oi yung hang-vì lòi chṳn-mìn ngì-teû yí-kîn fí-kói.
3:9 M̀-hó chhṳ-kâ sióng kóng, Ngài-teû yû Â-pak-lâ-hón cho chú-fu,chhiu mien-su sṳ́m-phan. Yîn-vi Ngài lâu ngì-teû kóng, Song-ti nèn tui liá-teû sa̍k-theù vi Â-pak-lâ-hón chho-chhut chṳ́-sûn.
3:10 Liá-ha pú-theù yí-kîn piong chhai su-theù-táng lô, só-yî mò kiet hó kó-chṳ́, chhiu chhiòn-phu chám-thet, fit-lo̍k fó tî-poi.
3:11 Ngài chhiu yung-súi hiong ngì-teû hàng sé-lî, peú-sṳ ngì-teû fí-kói; m̀-ku chhai Ngài heu-poi lòi ke ngìn, khièn-li̍t kien-thai ko Ngài, Kì-ke hài-è Ngài ya mò chṳ̂-kiet thoi Kì khoan, Kì yit-thin yung Sṳn-Lìn lâu fó vi ngì-teû hàng sé-lî.
3:12 Kì-ke sú nâ-tén pai-kî, oi kiet-chhiang Kì-ke ma̍k-chhon, chiông ma̍k-é sû-ngi̍p chhông-khu, chiông lùng-hông yung m̀-voi-me̍t ke fó lòi seû-thet kì.”