《客語漢羅聖經試讀版》

 | | | 轉寄

約翰福音 第十三章_1 耶穌洗學生ke腳

作者 客語聖經 2009.05.03

13:1 逾越節前，耶穌知祂離開這個世界轉去阿爸ke時候到lé,本來祂就愛惜在世界屬祂自家ke人，就愛惜他teû到底。
13:2 在食夜ke時，魔鬼已經控制加略人西門ke lái-é猶大ke心，使他決心出賣耶穌。
13:3 耶穌知阿爸有將一切ke權柄交在祂ke手，知自家係從上主該位出來，也oi倒轉上主該位去。
13:4 祂就hong起來，離開座位，脫下外衫；自家拿手帕圍在腰圈。
13:5 又倒水在腳盆，開始洗門徒ke腳，又用ke手帕來拭燥。
13:6 祂來到西門彼得ke面前，彼得對祂講：「主啊！祢oi洗我ke腳嗎？」
13:7 耶穌應他講：「我所做ke事你這下m̀知，m̀-ku到將來你就瞭解。」
13:8 彼得對他講：「我絕對無oi pûn祢洗我ke腳，」耶穌應他講：「若我無洗你ke腳，你就lâu我無關係。」
13:9 西門彼得對祂講：「主啊！M̀單淨洗我ke腳，手lâu頭那也oi洗。」
13:10 耶穌對他講：「身洗好ke人全身就淨浰，洗腳就夠；你teû係淨浰，獨係無全部淨浰án-ngiòng.」
13:11 因為耶穌知出賣祂ke係má人；所以就講：「你teû無全部淨浰。」
13:12 耶穌洗好他teû ke腳，將衫著起來，又坐倒轉去，就對他teû講：「我lâu你teû所做ke事，你teû明白嗎？」
13:13 你teû 喊我做先生lâu做主；你teû án-ngiòng講係chho̍k,因為我本來就係。
13:14 我係你teû ke主，你teû ke先生，又還洗你teû ke腳，你teû也應當彼此互相洗腳。
13:15 我做榜樣pûn你teû,使到你teû照我所做ke去行，你teû也照án-ngiòng來行。
13:16 我實在lâu你teû講，奴僕無比kiâ主過大，奉差派ke人也無比派祂ke人過大。
13:17 你teû已經知這teû事，若來行就有福。
13:18 我這個話m̀係指你teû眾人；我認識我所選ke人。總係聖經所講：「同我共下食飯ke人背叛我，這句話必定會實現。
13:19 我在事情màng發生以前先lâu你teû講，係oi pûn你teû在事情發生ke時，你teû就信我就係「自有永有」ke.
13:20 我實在lâu你teû講，接納我所差遣ke人就係接納我；接納我ke,也就係接納差遣我ke.