《客語漢羅聖經試讀版》

 | | | 轉寄

約翰福音 第十二章_5 耶穌講起自家死

作者 客語聖經 2009.04.26

12:27 「這下我ke心盡愁；我oi講mak-ke né? 阿爸啊！救我脫出這個時候，m̀-ku我為著這來ke, 一定oi經歷這苦難ke時節。
12:28 阿爸啊！願祢榮光祢ke名。」當時有聲從天頂下來，講：「我有榮光我ke名，也還oi再榮光它。」
12:29 Khî在該位ke眾人有聽到這個聲，就講係雷公；有別人講，係使者lâu祂講話。
12:30 耶穌應講：「這個聲m̀係為著我，係為著你teû ke緣故。
12:31 現在這個世界受審判lé;這下這世界ke統治者oi被上主逐走。
12:32 我假使被人從地上擎起ke時，就必oi吸引眾人來歸我。」
12:33 (祂講這teû話，就係指祂會ngióng般死法。)
12:34 眾人應祂講：「我teû ke律法有講基督存到永遠；祢ngióng般講，人子必定被人擎起？這人子係má人né ?」
12:35 所以耶穌對他teû講：「光在你teû當中ke時間無幾久lé,你teû oi趕還有這個光時繼續行，免得烏暗逐到你teû; 總係人行在烏暗中，就m̀知他會去nai位。
12:36 你teû oi趕還有這個光時，就信靠這個光，使到你teû成做光明ke子。」
12:37 耶穌講了這teû話，就離開他teû. 雖然耶穌在他teû面前有行神蹟，他teû還m̀信靠祂。
12:38 使到先知以賽亞ke話得應驗；就係祂所講ke話：主啊！我teû所傳ke道理，有má人信né? 主ke權能對má人顯明né?
12:39 他teû無法信，因為以賽亞也識講：
12:40 上主pûn他teû ke目青盲，也pûn他teû ke心硬。免得他teû ke目珠看到，他teû ke心了解。所以上主講：他teû m̀會轉向我，好pûn我來醫好他teû.
12:41 以賽亞講這teû話係因為看到耶穌ke榮光；指祂來講ke.
12:42 總係連ke-teû猶太人ke領袖中，也有好多人信祂；獨係因為驚法利賽人，m̀敢公開承認，驚被人逐出會堂；
12:43 因為他teû oi人ke榮光大過oi上主ke榮光。
12:44 耶穌大聲講：「人信靠我，m̀係單淨信靠我，係信靠差遣我來ke.
12:45 人看到我，就係看到差遣我來ke.
12:46 我係光，來入世間，使到凡信靠我ke人，m̀會住在烏暗。
12:47 若有人m̀ thèn我ke話，我無審判他；因為我來m̀係來審判世間人，係來救他teû.
12:48 人拒絕我，m̀接納我ke話，就有審判他ke; 就係我所講過ke道理，在末日會審判他。
12:49 因為我m̀係憑自家ke權柄來講；差遣我ke阿爸，祂有傳命令pûn我，阿爸ngióng般講，我就oi傳mak-ke.
12:50 我也知祂ke命令係永生；所以我所講ke,係照阿爸識對我講ke,我就án-ngiòng來講。