《客語漢羅聖經試讀版》

| | | 轉寄

馬太福音第二十五章_03 最後ke審判

25:31「當人子在祂ke榮光lâu眾使者同祂共下ke時候,祂oi坐在榮光ke寶座頂。
25:32萬民全部oi聚集在祂面前,祂就將他teû分做兩群,像掌羊ke人將綿羊對山羊中分開來án-ngiòng.
25:33祂oi將綿羊放在右片,山羊就放在左片。
25:34王就oi對在祂右片ke人講:『你teû得到Ngâ爸賜福ke人,好行前來承受對創造世界以來就為著你teû所準備ke國。
25:35因為我肚飢,你teû pûn我食;我嘴燥,你teû pûn我飲;我出外流浪,你teû就接納我;
25:36我打赤膊,你teû就pûn我著;我發病,你teû照顧我;我在坐監仔,你teû來看我。』
25:37「Ke-teû義人就應祂講:『主啊!我teû在幾時看到祢肚飢,就pûn祢食;你嘴燥,就pûn祢飲?』
25:38 又在幾時看到祢出外流浪,就接納祢;祢打赤膊,就pûn你著?
25:39又在幾時看到祢發病,或者在坐監仔,就來照顧祢喏?』
25:40王一定oi對他teû講:『我實在lâu你teû講,你teû已經有行這teû事在我ke-teû兄弟身上,就係行這teû事在我身上!』
25:41「然後,王又oi對祂左片ke人講:『你teû受咒詛ke人,好離開我,入去ke為著魔鬼lâu他ke 爪牙所準備永遠不滅ke火底背!
25:42因為我肚飢,你teû無pûn我食;我嘴燥,你teû無pûn我飲;
25:43我出外流浪,你teû無接納我;我打赤膊,你teû無pûn我著;我發病,也係坐監仔,你teû也無照顧我。』
25:44 “「該時,他teû就應祂講:『主啊!我teû在幾時看到祢肚飢,也係嘴燥,也係出外流浪,也係打赤膊,也係發病,也係坐監仔,無服事祢喏?』
25:45祂就應他teû講:『我實在lâu你teû講,你teû當中無行這teû事,m̀肯幫助人,就係無行這teû事來幫助我。』
25:46這teû人oi受永遠ke刑罰;總係ke-teû義人就oi得永生。